- مدرستى نظيفة وجميلة ومتطورة
الشعار ده ديما تلاقيه على أسوار المدارس الحكومية ونادرا ما تلاقيه مكتوب على أسوار المدارس الخاصة ..ورغم إننا وإحنا طلبة إذ فجأة وبين يوم وليلة لاقينا مكتوب على أسوار مدارسنا ( مدرستي نظيفة وجميلة ومتطورة ) إلا إن إدارة المدرسة او حتى المدرسين لم يحاول أحد انه يشرح لنا الشعار ده وايه المطلوب مننا بالضبط علشان تكون مدرستنا نظيفة وجميلة ومتطورة ..وكأن المدرسين والادارة هما كمان صحوا الصبح وفجئوا بالشعار ده زيهم زينا .. وشىء طبيعي بأه فى ظل هذا الاذبهلال العام من طلبة ومدرسين وإدارة إن مدارسنا الحكومية تكون مقلب للزبالة .. ونتيجة لهذا المقلب الزبالي تفتقت أذهان إدارة المدرسة عن فكرة لم يسبقهم إليها لا إنس ولا جان وهى تحويل طلبة المدرسة بالدور وتبعا لترتيب اسماء الطلبة فى الكشف إلى ( زبالين) وأطلقوا على العملية دي إسم ( الخدمة المدرسية ) وهكذا كل طالبين فى الكشف بينزلوا زبالين أقصد خدمة .. فيصعدوا إلى الفصول أثناء طابور الصباح ليقوموا بالتنظيف قبل ان يصعد لطلبة إلى الفصول من الطابور .. والغريب إن الطلبة قد رضوا ووافقوا على هذا الوضع فرحا منهم بأنهم موش حيقفوا طابور الصباح .. فكان منهم انهم بيصعدوا للفصول للعب بدلا من التنظيف .. هذه هى مدارسنا النظيفة والجميلة والمتطورة التى حولت طلبتها من طلبة للعلم إلى زبالين .


2- لو لم اكن مصريا لوددت أن أكون مصريا
هذا الشعار من أجمل الشعارات المصرية من وجهة نظري .. وقال الشعر ده الزعيم
( مصطفى كامل) .. ويربطني بهذا الزعيم حالة وجدانية خاصة ..فأنا احب وأحترم هذا الرجل وأرى أنه الوحيد على مدار تاريخ مصر الحديث اللى ىيستحق لقب ( الزعيم) دون منازع .. وأطلق ( مصطفى كامل) الشعار ده متغزلا فى معشوقته مصر .. وبعض الدعاة بتقولك إن الشعار ده حرام .. طب ليه ؟! ، يقوللك علشان الشعار ده بيعلو بالنعرة الوطنية فوق الرابطة الاسلامية ! وطبعا هذا الكلام فى غير موضعه أصلا وتحريم كمان فى غير موضعه لإنه ليس حراما إن الانسان يمتدح وطنة ويفخر بالانتساب إليه ولم يعلوا مصطفى كامل به مصطفى كامل قط فوق الرابطة الاسلامية بدليل أنه كان من دعاة ربط مصر بالدولة العثمانية لبيان عدم مشروعية الاحتلال البريطاني فى المحافل الدولية .



3- لا صوت يعلو فوق صوت المعركة
إزداد الشعار ده فى الرواج بعد نكسة 67 وأمل المصريين كلهم فى معركة لرد الكرامة وبالتالى حشد كل الامكانيات والقوى لتلك المعركة المرتقبة ومن هنا جاء هذا الشعار ( لا صوت يعل فوق صوت المعركة ) وهو وإن كان له جوانب إيجابية إلا أن الجزء السلبي فيه كان مخفي تحت بريق هذا الشعار وهو عدم وجود أى إصلاحات حقيقية للأشياء اللى كانت سبب فى النكسة تحت شعار موش وقته ولا صوت يعلو فوق صوت معركتنا وكأن الانتصارات تصنعها الشعارات .


4- مصر للمصريين
رفع الشعار ده فى فترة من الفترات مجموعة من المثقفين المصريين أشهرهم ( أحمد لطفي السيد) وقد يبدو يعنى ان الشعار ده اشطة وزى الفل لكن فى واقع الامر الشعار ده مطلعش إلا لفصل مصر عن جسد الامة الاسلامية وخصوصا الدولة العثمانية .. والغريب إن اشهر من رفع الشعار ده وهو أحمد لطفي السيد واللى تم تدريسة لنا فى مادة التربية الوطنية على انه مثال للوطنية كان شخصية مهادنة للأنجليز بل ووصل به الامر انه وصف قادة الاحتلال الانجليزي أنهم ولاة امور المصريين وهاجم اللغة العربية الفصحى وذهب لاسرائيل وإفتتح الجامعة العبرية .. واتفرج يا سلام على اللى رفعوا شعار ( مصر للمصريين ) ..!!